Prisen skal eigentleg delast ut på Peer Gynt-stmnet på Vinstra 31. juli.

Men då er han truleg på reise med Manchester United, så prisen må delast ut ein annan dag. Stemnet varer frå 29. juli til 8. august.

- Verdig vinnar

- Ole Gunnar er ein verdig og flott prisvinnar som vi ønskjer velkommen inn i Peer Gynt klubben, seier Marit Breivik, leiar av nominasjonskomiteen, ifølgje Peer Gynt-stemnet si heimeside.

Ole Gunnar Solskjær har framstått som ein framifrå rollemodell for barn og unge verda over, og han har engastert seg sterkt i UNICEF, heiter det i grunngjevinga.

36-åringen har fått mange prisar og utmerkingar tidlegare. I 2008 vart han slått til riddar av første klasse av St. Olavs-orden, og han fekk Kniksen-prisen - den høgaste utmerkinga i norsk fotball - i 2007.

Peer Gynt-prisen vart stifta i 1971, med Einar Gerhardsen som den første prisvinnaren. Sidan 1973 er det ein nominasjonskomité som har peika ut kandidatane, og stortingsrepresentantane som har gjort det endelege valet.

Blant tidlegare prisvinnarar er Kjell Inge Røkke - han vart Årets Peer Gynt i 2006. Thor Heyerdahl, Gro Harlem Brundtland og (dåverande) kronprinsesse Sonja er også blant dei som har vunne prisen.